जाजरकोट २६ कात्तिक । जाजरकोटमा यात्रु वहाक फोर्स गाडी दुर्घटना हुँदा १७ जना घाइते भएका छन् । सोमबार बिहान भेरी नगरपालिका -७ को स्यालीबजारबाट नेपालगञ्जतर्फ आउँदै गरेको बा ५ ख १८९२ नम्वरको फोर्स गाडि कुदु नजिक ब्रेक फेल भएर दुर्घटना भएको हो ।
दुर्घटनामा परेर १७ जना घाईते भएको बताईएको छ । घाईतेहरुलाई स्थानीय र प्रहरीले तत्काल उद्धार गरेर प्राथमिक स्वास्थ्य केन्द्र कुदुमा उपचारका लागि लगेका थिए । स्वास्थ्य केन्द्रका अनुसार घाईतेलाई सामान्य उपचारपछि थप उपचारको लागि जिल्ला अस्पताल जाजरकोट पठाईएको छ ।
गाडिमा २६ जना यात्रुहरु सवार रहेको र त्यसमध्य १७ जना घाईते भएका हुन् । दुर्घटनामा परेर हालसम्म मानविय क्षति भने भएको छैन । चालकसहित केहि यात्रुहरुको अवस्था गम्भिर रहेको प्रहरीले बताएको छ ।
प्रहरीले दुर्घटनाको पुरा विवरण आईनसकेको जनाएको छ । गाडि सडकबाट करिब ४० मिटर तल खसेको बताईएको छ । क्षमता भन्दा बढी यात्रु बोकेको गाडिको ब्रेक फेल भएका कारण मोडनेर दुर्घटना भएको यात्रुहरुले जनाएका छन् ।
