काठमाडौँ । हाल मनसुनको न्यून चापीय रेखा सरदर स्थानको आसपासमा अवस्थित रहेको र अरब सागर तथा बङ्गालको खाडीबाट जलवाष्पयुक्त हावाको समेत प्रभावका कारण देशभरको मौसम बदली भएको छ । मौसम पूर्वानुमान महाशाखाले दिएको जानकारी अनुसार, यसको प्रत्यक्ष प्रभावले देशका पहाडी भूभागमा सामान्यतया बदली रहेको छ भने बाँकी भूभागमा आंशिक बदली देखिएको छ ।
विशेषगरी, कोशी, बागमती र सुदूरपश्चिम प्रदेशका केही स्थानहरूमा तथा अन्य प्रदेशका एक–दुई स्थानमा हल्कादेखि मध्यम वर्षा भइरहेको छ ।
आज दिउँसो देशभर सामान्यतया बदली रहनेछ । कोशी, बागमती, गण्डकी, लुम्बिनी र सुदूरपश्चिम प्रदेश लगायत देशका पहाडी भूभागका केही स्थानहरूमा मध्यम वर्षाको सम्भावना रहेको छ । यसका साथै, बाँकी भूभागका केही स्थानहरूमा पनि मध्यम वर्षा हुनेछ । महाशाखाले कोशी, मधेस, बागमती, लुम्बिनी र सुदूरपश्चिम प्रदेशका पहाडी तथा तराईका एक–दुई स्थानमा भारी वर्षाको सम्भावना रहेको जनाएको छ ।
आज राति देशभर सामान्यतया बदली रहनेछ। कोशी, मधेस, बागमती, गण्डकी र लुम्बिनी प्रदेशका केही स्थानहरूमा तथा बाँकी भूभागका एक–दुई स्थानमा मध्यम वर्षाको सम्भावना रहेको छ । कोशी, मधेस, बागमती, लुम्बिनी र सुदूरपश्चिम प्रदेशका पहाडी र तराई भूभागका एक–दुई स्थानमा भने भारी वर्षाको सम्भावना अझै पनि कायम रहेको महाशाखाले बताएको छ ।
महाशाखाले भारी वर्षाको सम्भावना रहेका क्षेत्रहरूमा आवश्यक सतर्कता अपनाउन सबैमा अनुरोध गरेको छ ।
