गुल्मी, साउन २४ गते। लुम्बिनी प्रदेशका मुख्यमन्त्री चेतनारायण आचार्यले आदिवासी जनजाति समुदायको मौलिक पहिचान, भाषा, संस्कृति, परम्परा, ज्ञान र सीपको संरक्षणसँगै आर्थिक तथा सामाजिक सशक्तीकरणका लागि प्रदेश सरकार प्रतिबद्ध रहेको बताउनुभएको छ।
विश्व आदिवासी दिवसका अवसरमा आइतबार शुभकामना सन्देश जारी गर्दै मुख्यमन्त्री आचार्यले बहुजातीय, बहुभाषिक, बहुधार्मिक तथा बहुसांस्कृतिक विविधताले सम्पन्न लुम्बिनी प्रदेशको समृद्धिमा आदिवासी जनजाति समुदायको महत्वपूर्ण योगदान रहेको उल्लेख गर्नुभएको हो।
उहाँले विभिन्न आदिवासी जनजाति समुदायले पुस्तौँदेखि आफ्ना मौलिक भाषा, संस्कृति, संस्कार, परम्परा, कला, साहित्य, ज्ञान, सीप र जीवनपद्धतिको संरक्षण गर्दै प्रदेशको सामाजिक तथा सांस्कृतिक पहिचानलाई समृद्ध बनाउँदै आएको बताउनुभएको छ।
थारू, मगर, गुरुङ, नेवारलगायत आदिवासी जनजाति समुदायको मौलिक संस्कृति र परम्परा लुम्बिनी प्रदेशको महत्वपूर्ण सांस्कृतिक सम्पदा भएको उहाँको भनाइ छ।
मुख्यमन्त्री आचार्यले नेपालको संविधानले समानता, सामाजिक न्याय, समावेशिता, सहभागिता तथा सांस्कृतिक अधिकार सुनिश्चित गरेको उल्लेख गर्दै संविधानको मर्मअनुसार सबै जातजाति, भाषा, धर्म, समुदाय र संस्कृतिको समान सम्मान, पहिचान र अधिकारको संरक्षण गर्नु प्रदेश सरकारको दायित्व भएको बताउनुभएको छ।
लुम्बिनी प्रदेश सरकार समावेशी लोकतन्त्र, सामाजिक न्याय र समान अवसरको सुनिश्चिततामार्फत प्रदेशको समग्र विकास गर्ने दिशामा अघि बढिरहेको उहाँले बताउनुभयो।
विकासको प्रतिफल समाजका सबै वर्ग, समुदाय र भूगोलसम्म समान रूपमा पुग्नुपर्ने मान्यताका साथ नीति, योजना तथा कार्यक्रम निर्माण र कार्यान्वयनमा विविध समुदायको अर्थपूर्ण सहभागितालाई प्राथमिकता दिइएको उहाँको भनाइ छ।
आदिवासी जनजाति समुदायसँग रहेको परम्परागत ज्ञान, सीप, प्रविधि, भाषा, कला, संस्कृति र जीवनपद्धति अमूल्य सम्पत्ति भएको बताउँदै मुख्यमन्त्री आचार्यले आधुनिक विकाससँगै मौलिक पहिचान र सांस्कृतिक सम्पदाको संरक्षणमा ध्यान दिनुपर्नेमा जोड दिनुभएको छ।
मौलिक संस्कृति र पहिचानको संरक्षणलाई आर्थिक तथा सामाजिक सशक्तीकरणसँग जोड्नुपर्ने बताउँदै उहाँले आदिवासी जनजाति समुदायका युवापुस्तालाई आफ्नो भाषा, संस्कृति र परम्परासँग जोड्ने वातावरण निर्माण गर्नुपर्ने उल्लेख गर्नुभएको छ।
