तुलसीपुर, २२ मंसिर । थारु कल्याणकारिणी सभा दाङ देउखुरी क्षेत्र नम्बर ३ ले माघ महोत्सवको आयोजना गर्नेविषयमा थारु अगुवा तथा बुद्धिजीविहरूसँग छलफल गरेको छ । आज शनिबार तुलसीपुर उपमहानगरपालिका वडानम्बर ५ स्थित नमुना भूह्याँर थान जबरपुरमा थारु अगुवा, बुद्धिजीवी, थारू जनप्रतिनिधिहरुसँग माघ महोत्सव गर्ने विषयमा छलफल गरेको हो ।
थारु कल्याणकारिणी क्षेत्र नम्बर ३ का अध्यक्ष मोहोन कुमार थारुको अध्यक्षतामा भएको बैठक तथा छलफलमा थारु समुदायको हराउँदै गएको सांस्कृतिक धरोहरको संरक्षण र माघ पर्वको महत्वप्रति छलफल भएको हो ।
थारु समुदायको प्राचीन सांस्कृतिक पहिचानलाई जोगाउन र आगामी पुस्तासम्म यसलाई हस्तान्तरण गर्न, दंगीशरण राजाको इतिहास प्रचारप्रसार गर्न आवश्यक कदमहरू अघि बढाउनुपर्ने सहभागीहरुले जोड दिइएका थिए । थारु समुदायको हराउदै गएको संस्कृति संरक्षण र प्रबर्द्धनका लागि समुदायलाई सचेत बनाउने र स्थानीय सरकार तथाविभिन्न थारू संघ संस्थाहरूको सहकार्य आवश्यक रहेकोमा उनीहरुले जोड दिएका हुन् ।
थारु समुदायको माघ पर्वको महत्वलाई जनसमूहमा प्रकट गर्दै, संस्कृति र परम्पराहरूको संरक्षणमा समुदायको सक्रिय सहभागिता सुनिश्चित गर्ने सभाले उद्देश्य राखेको छ ।
माघ महोत्सवको लागि दाङ क्षेत्र नम्बर ३ अन्तर्गत पर्ने तुलसीपुर उपमहानगरपालिका, दंगीशरण गाँउपालिका, शान्तिनगर गाँउपालिका, बबई गाँउपालिका, तुलसीपुर- ११ नम्बर वडासँग समन्वय गरेर अघि बढ्ने बैठकले निणर्य गरेको छ ।
सभाको आगामी बैठक मंसिर ३० गते तुलसीपुर उपमहानगरपालिका वडा नम्बर ११ मा रहेको थारु राजा सुकौराकोट दरबारमा बस्ने निणर्य गरिएको सचिव जितेन्द्र चौधरीले जानकारी दिनुभयो ।
यसैबिच स्थानीय सरकारसंग समन्वयका लागि पाँच सदस्यीय टोलि गठन भएको छ । जसमा मोहन कुमार थारु, आशा चौधरी, सत्यनारायण चौधरी, जनकलाल चौधरी र इन्द्रजित चौधरी रहनुभएको छ ।
