काठमाडौं । लामो समयदेखि चर्चामा रहेको नेपाल स्काउटको लैनचौरस्थित जग्गामा बनेका अनधिकृत संरचनामाथि काठमाडौं महानगरपालिकाले अन्ततः डोजर चलाएको छ । पूर्वऊर्जामन्त्री एवं कांग्रेस नेता दिपक खड्काको कम्पनी ‘खड्का ल्याण्ड’ ले भोगचलन गरिरहेको उक्त जग्गामा निर्मित लैनचौर ब्याङ्क्वेट, माई च्वाइस रेस्टुरेन्ट र अन्य व्यावसायिक भवनहरूमाथि महानगरको डोजर चलेको हो ।
युवा तथा खेलकुद मन्त्रालयअन्तर्गतको नेपाल स्काउट राष्ट्रिय प्रधान कार्यालयले खड्का ल्याण्डलाई बहाल बक्यौता तिर्न पटकपटक ताकेता गरे पनि बेवास्ता गरिएपछि महानगरले एक्सन लिएको हो । पछिल्लो पटक ७ दिने अल्टिमेटमसहितको सूचना निकालेर बहाल बक्यौता नतिरे संरचनाहरू जफत गर्ने चेतावनी दिएको थियो । उक्त अल्टिमेटमको म्याद सकिएलगत्तै आज महानगर प्रहरी डोजरसहित घटनास्थलमा पुगेको थियो ।
२०६५ सालमा नेपाल स्काउटले भाडामा दिएको ३ रोपनी जग्गामा खड्का ल्याण्डले लैनचौर ब्याङ्क्वेट सञ्चालन गर्दै आएको थियो । यसका साथै ‘माई च्वाइस’ नामक रेस्टुरेन्ट र दुईवटा व्यावसायिक भवन पनि निर्माण गरिएका थिए । यी दुई व्यावसायिक भवनमध्ये पहिलो २०६३ सालमा र दोस्रो २०६४ सालमा टेन्डरमार्फत खड्का ल्याण्ड डेभलपमेन्टलाई दिइएको थियो। यी भवनहरूमा क्रमशः ३६ र १२ वटा पसलहरू भाडामा लगाइएको थियो।
कानुनी प्रक्रिया र पटकपटकको चेतावनीपछि पनि बहाल बक्यौता नतिरेपछि महानगरले बल प्रयोग गरेर अनधिकृत संरचना हटाएको हो ।
