तेस्रो आँखा
काठमाडौं, २६ साउन। वन नियमावली २०७९ तत्काल खारेज गर्नुपर्ने भन्दै सामुदायिक वन उपभोक्ता महासंघ नेपालले काठमाडौंमा विरोध प्रदर्शन गरेका छन् ।
वन तथा वातावरण मन्त्रालयबाट २०७९ असार १९ गते राजपत्रमा प्रकाशित वन नियमावली २०७९ नेपालको संविधान, संघीयता, वन ऐन २०७६, सामुदायिक वन अधिकार र महिला अधिकार विरोधी भएको भन्दै महासंघले वन नियमावली खारेज गर्नुपर्ने मागसहित काठमाडौंको माइतीघरमा विरोध प्रदर्शन गरेका हुन् ।
वन क्षेत्रमा योगदान पुराउने सामुदायिक वन उपभोक्ताहरुलाई मारमा पार्नेगरी नियमावली ल्याएकाले निरन्तर विरोध गर्नुपरेको महासंघकी अध्यक्ष भारती पाठकले बताए । समुदायिक वन उपभोक्ताको अधिकारी कटौती भएको विषयमा पटकपटक राज्यको ध्यानाकर्षण गराउँदा पनि नसुनिएको उनको भनाइ छ ।
उक्त नियमावली तत्काल खारेज गराउनका लागि सामुदायिक वन उपभोक्ता महासंघले जिल्ला, प्रदेश तथा केन्द्रीयस्तरमा विभिन्न आन्दोलनका कार्यक्रम गर्दै आएको जनाएको छ ।
