काठमाडौं । निर्वाचन आयोगले आगामी प्रतिनिधिसभा र प्रदेशसभा निर्वाचनका लागि समानुपातिकतर्फको बन्दसूची बुझाउनका लागि तोकेको समय आज सकिँदै छ ।
आयोगले तोकेको पहिलो दिन अर्थात हिजो दुई दलले मात्रै बन्दसूची बुझाएका थिए । आइतबार नेपाल समावेशी पार्टी र तराई मधेस लोकतान्त्रिक पार्टीले प्रतिनिधिसभातर्फको बन्दसूची पेस गरेको आयोगका सहायक प्रवक्ता सूर्यप्रसाद अर्यालले बताए ।
त्यस्तै, प्रदेशसभाका लागि प्रदेश नम्बर १ मा किराँत खुम्बुवान साझा पार्टी, वाग्मतीमा तामाङशाली पार्टी र मधेस प्रदेशमा तराई मधेस लोकतान्त्रिक पार्टीले बन्दसूची पेस गरेका अर्यालले जानकारी दिए । दलहरू बन्दसूचीका लागि आन्तरिक छलफलमा छन् ।
