काठमाडौं । पूर्व सुरक्षाकर्मी परिषद् नेपालले चप्पलमा खुकुरी चिह्न छापेको भन्दै म्याजिक कम्पनीविरुद्ध आपत्ति जनाएको छ । कम्पनीले हालै बजारमा ल्याएको चप्पलमा नेपालको राष्ट्रिय हतियार खुकुरी राख्दा नेपालकै अपमान भएको परिषद्ले उल्लेख गरेको छ । विश्वमा वीर नेपालीलाई चिनाउने पहिचानलाई अपमानजनक ढंगले मानिसको पैतालाले टेक्ने भाग र फितामा समेत छापेको परिषद्का अध्यक्ष कोमलबहादुर राउतद्वारा हस्ताक्षरित विज्ञप्तिमा उल्लेख छ ।
विगत केही वर्षदेखि योजनावद्धरुपमा नेपालीको सानमा आँच पुऱ्याउने गतिविधिहरु विदेशीको इसारामा संचालन हुँदै आएको पनि परिषद्ले उल्लेख गरेको छ । जुत्तामा नेपालको राष्ट्रिय झण्डा,भगवान बुद्धको तस्विर चप्पलमा र नेपाल राष्ट्र एकीकरण हुँदा वीर पूर्खाले प्रयोग गरेको ऐतिहासिक हतियारहरु विदेशीलाई विक्री गर्नेलगायतका क्रियाकलाप पनि राष्ट्रियताविरुद्धका कदम भएको राउतले उल्लेख गरेका छन् ।
कुनै पनि देशको राष्ट्रिय चिह्न घुँडाभन्दा मुनिको भागमा प्रयोग गरिनुलाई अपमानजनकरुपमा लिइन्छ । वीरताको प्रतिकका रुपमा युगौंदेखि परिचित राष्ट्रिय हतियारकोरुपमा रहेको खुकुरी कम्मरमा भिर्ने र शिरको टोपीमा लोगोका रुपमा लगाउने नेपालीको सभ्यता तथा पहिचान भएको परिषद्को दाबी छ ।
चप्पलमा खुकुरी चिह्न छाप्ने हर्कतलाई सरकारले समयमानै आवश्यक अनुसन्धान गर्न नेपाल प्रहरीलाई निर्देशन दिनुपर्ने माग विज्ञप्तिमा उल्लेख गरिएको छ । यस्तै बजारमा उपलब्ध चप्पलहरु यथासिघ्र कब्जामा लिई नष्ट गर्न र दोषीमाथि राष्ट्रिय चिह्नको दुरुपयोग गरेकामा कानुनबमोजिम कारवाही गर्न समेत परिषद्ले सरकारसँग माग गरेको छ । परिषद्ले देशभक्त नेपाली बुबाआमा, दाजुभाइ, दिदीबहिनी र सम्पूर्ण बहालवाला तथा पूर्व सुरक्षाकर्मीई खुकुरी चिह्न अंकित चप्पल खरिद गरेर खुट्टामा नलगाउन आग्रह समेत गरेको छ ।
