काठमाडौं । राजस्व अनुसन्धान विभागबाट एक क्विन्टल सुन काण्डमा पक्राउ परेका आरोपी र संकलित प्रमाण आइतबार नेपाल प्रहरीले बुझेको छ । विभागका महानिर्देशक नवराज ढुंगानाका अनुसार यो काण्ड अन्तर्राष्ट्रिय संगठित अपराध भएकाले अनुसन्धानको जिम्मा प्रहरीलाई दिएको हो ।
निर्देशक ढुंगानाका अनुसार १७ जना आरोपी र अन्य कागजी प्रमाण प्रहरीलाई बुझाइएको हो । प्रहरी प्रवक्ता कुबेर कडायतका अनुसार आरोपीहरुलाई सीआईबी हिरासत महाराजगन्जमा राखिएको छ । उनले कान्तिपुरसँग भने, ‘मिसिलसहित आरोपीको जिम्मा प्रहरीले लियो । भोलिबाट अनुसन्धान सुरु हुन्छ ।’
यस प्रकरणमा विभागले विमानस्थल भन्सार कार्यालयका तीन कर्मचारीसहित १८ जनालाई पक्राउ गरेको हो । एक भन्सार एजेन्ट रुक्मिान सुब्बालाई हाजिरी जमानीमा छोडेको थियो ।
