काठमाडौँ । सुन तस्करी जाँचबुझ आयोगले सह–सचिव झलकराम अधिकारीसँग बयान लिएको छ । आइतबार अध्यागमन विभागका पूर्व महानिर्देशक अधिकारीलाई सिंहदरबार स्थित आयोगको कार्यालयमा बोलाएर बयान लिइएको आयोग स्रोतले जनाएको छ ।
सह–सचिव अधिकारी हाल सामान्य प्रशासन मन्त्रालयको अतिरिक्त समूहमा कार्यरत छन् । ६० किलो सुन तस्करीमा संलग्न बेल्जियन नागरिक दावा छिरिङसँग सह–सचिव अधिकारीको ‘कनेक्सन’ देखिएको छ ।
हङकङबाट तस्करी गरेर काठमाडौँ ल्याएको ६० किलो ७ सय ग्राम सुन प्रकरणका संलग्न प्रतिवादी दावासँग अधिकारीले ह्वाट्स एपमा शंकास्पद कुराकानी गरेको केन्द्रीय अनुसन्धान ब्यूरो (सिआइबी)ले गरेको अनुसन्धानमा खुलेको थियो । तर, राजनीतिक शक्तिकेन्द्रको दबाबमा सिआईबीले उनलाई सरकारी साक्षी बनाएर अनुसन्धान प्रतिवेदन बुझाएको थियो । उनलाई सुन तस्करी मुद्दामा प्रतिवादी नबनाएकोबारे प्रश्न उठेको छ ।
दावासँग कुरा गरेको स्क्रिनसट बाहिरिएपछि उपप्रधान एवं गृहमन्त्री नारायणकाजी श्रेष्ठले अधिकारीलाई अध्यागमन विभागबाट हटाएर गृह मन्त्रालयमा सरुवा गरेका थिए । त्यसपछि उनी गृह मन्त्रालय छाडेर सामान्य प्रशासनमा सरुवा भएका हुन् ।
असोज १४ मा मन्त्रिपरिषद्ले सुनको अवैध पैठारी (तस्करी) नियन्त्रण सम्बन्धी जाँचबुझ आयोग गरेको थियो । सुरुमा ३ महिना समय दिइएको आयोगको समयसिमा थप २ महिना थप्ने निर्णय गरिएको छ ।
