वडामा भएका गतिविधिहरु सर्वसाधारणमा जानकारी गराउने उद्देश्यले तेस्रो आँखा डट कमले विभिन्न पालिकाहरुका वडा अध्यक्षहरुसँग पाँचवटा प्रश्नहरु सोध्ने अभियान चलाएको छ । सो अभियान अन्तर्गत आज हामीले तुलसीपुर उपमहानगरपालिका वडा नं। १७ का वडाध्यक्ष थलराज पुरीसँग पाँचवटा प्रश्नहरु सोधेका छौं । प्रस्तुत छ, वडाध्यक्ष पुरीसँग तेस्रो आँखाकी सहसम्पादक अञ्जना चौधरीले गरेको कुराकानीको सम्पादित अंंश ।  

१- जनतालाई चुनावको समयमा गरेका बाचाहरु मध्ये कति काम सम्पन्न भयो र कति काम हुन बाँकी छ ?

हामीले चुनावको समयमा जनताहरुसँग गरेका बाचा अनुसार काम गर्दै आएका छौं र केही काम सम्पन्न भईसकेका छन् भने केही काम हुन बाँकी नै छ । हामी निर्वाचित भएर आएको दुईवर्षमा जनताहरुलाई गरेको बाचाकै आधारमा काम भएको छ । तर बजेट अभावले सबै काम भनेको समयमा सम्पन्न गर्न समस्या भएको छ । तर पनि बाटो कटिंगको काम, कृषी क्षेत्र र लक्षित वर्षकोलागि सिप मूलक तालिम सञ्चालन गरिरहेका छौं । यो दुई वर्षको अवधिमा काम सन्तोस जनक नभए पनि ठिकै भएको छ । यो वर्ष वडामा डेढ करोड बजेट आएकाले जनताहरुमा देखिने खालको सबै टोलमा टिकाउ हुने खालको काम गर्नेछौं भन्ने लागेको छ ।

मैले चुनावको समयमा आफुले गर्न नसक्ने कामको आस्वासन दिँदैन, यो मेरो स्वभाव हो । तर नबोल्ने काम चाहि गर्नु पर्छ भन्ने मेरो मान्यता छ । म जनप्रतिनिधि भएपछि चौवाँ खोलामा पुल बनाउने योजना थियो । अहिले ३ करोड १८ लाख लागतमा त्यहाँ पुल बनेको छ । पुलको छेउमा वाल लगाउने काम मात्रै बाँकी छ, यो वर्ष पुलको सबै काम सम्पन्न हुन्छ । त्यसैगरी जमेरास्थित संग्राम खोलामा बक्स कल्भट बनाउने योजना छ । म मेरो कार्यकालमा त्यो काम पनि पुरा गर्छु । त्यसैगरी शिक्षा तर्फ हामीले मावि विद्यालयमा प्रत्येक वर्ष बजेट विनियोजन गर्दै आएका छौं । दिपेन्द्र मावि मानपुरमा तुलसीपुर उपमहानगरपालिका, पर्यावरणको सहयोगमा भवन बनेको थियो । हामीले त्यही भवनमा रेलिंग बनाउने, झ्याल ढोकामा ग्रिल राख्ने, पल्ला राख्ने काम गरेका छौं । यो वर्ष पनि करिब ३ लाख बजेट शिक्षा क्षेत्रकोलागि छुट्याएका छौं । त्यसैगरी स्वास्थ्य तर्फ हाम्रो वडामा रहेको मानपुर हेल्थपोष्टकोलागि बजेट छुट्याएर मर्मत गरेका छौं । अहिले हामी पुर्ण स्वास्थ्य वडा घोषणा गर्नकोलागि अगाडी बढेका छौं । जनताहरुले बजेट माग गर्दा बाटो, कल्भट र पुलहरु आदि माग्नु हुन्छ । तर शिक्षा र स्वास्थ्यकोलागि बजेट मागेको पाइदैन् । तर हामीले आफ्नो तर्फबाट प्रत्येक वर्ष शिक्षा स्वास्थ्य क्षेत्र सुधारकोलागि बजेट छुट्याउँदै आएका छौं । वडामा रहेको हेल्थपोष्टको भवन जिर्ण भएकाले त्यसलाई अर्को ठाउँमा सार्नकोलागि जग्गा व्यवस्थापन गरि तारबार गरेका छौं । हेल्थपोष्टलाई तारबार गरेको स्थानमा सार्नका लागि तयारीमा छौं । 

२- तुलसीपुर १७ मा रहेको मानपुर बजारलाई पुरानै लयमा फर्काउनकालागि वडा कार्यालयले केही पहल गरेको छ ?

एक त हाम्रो वडा कार्यालय नै पायक पर्ने ठाउँमा छैन । त्यसकारण वडालाई पनि व्यवस्थापन गर्नु पर्ने अवस्था छ । अहिले केही बजेट नगरपालिका र केही बजेट समानिकरणबाट आएको छ । सबैले एकमतका साथ यो वडा कार्यालयलाई बनकट्टीमा सार्ने सर्वसम्मत तयारी भएको छ । त्यसका साथै यो मानपुर बजारलाई पहिलेको अवस्थामा ल्याउन त मुस्किल छ । तर त्यसलाई चलायमान गराउनु पर्छ भन्ने उद्देश्यका साथ लागेका छौं । अहिले मानपुरदेखि एअरपोर्टसम्मको बाटो स्तर उन्नतिकालागि दुई करोड बजेट परेको छ । त्यसका साथै मानपुरमै रहेको पुरानो शिवालय मन्दीरलाई मर्मत गर्नुपर्छ भनेर लागेका छौं । आफुले सक्ने काम वडाले गर्दै आएको अवस्था छ । मानपुरदेखि साइपुरहुँदै तुलसीपुरसम्म जाने बाटो मर्मतकालागि बजेट परेको छ । टेण्डर प्रक्रियामा गएर यो वर्ष तुलसीपुरसम्म नालासहित बाटो पीच हुन्छ । 

३- पहिलो कार्यकाल सिकाई मै बित्यो भनिन्छ, तपाईको यो दोस्रो कार्यकाल हो । तर पनि जनअपेक्षा अनुसार काम भएन भन्ने गुनासो सुनिन्छ नी ? 

सबैको चाहाना अनुसार सबैको आवश्यकता पुरा गर्न सकिँदैन । सबै जनताहरुलाई समेटेर सबैको सबै काम पुरा गर्न सम्भव पनि छैन । जनताहरुको इच्छा आकाँक्षा धेरै हुन्छ, वडामा बजेट कम आउँछ, बजेटलाई परिचालित गर्दै गर्दा सबैको मागअनुसार काम नभएको पक्कै हो । हाम्रो पहिलो कार्यकाल भोगाइ, सिकाई मै बित्यो, केही कमिकमजोरी हामीबाट पनि भए होलान । तर हामीले गलत काम गरेनौं । सबैको चित्त बुझाउन सकिएन होला, तर बजेट बाँडफाडको क्रममा वडामा रहेका सबै टोललाई समेटेका छौं । सबै टोललाई बजेट बाँडफाड गर्दा कम त पर्छ नै तर आम जनता र आम टोलको गुनासो सम्बोधन हुन्छ जस्तो लाग्छ । लक्षित वर्गको कार्यक्रम, ह्युमपाइव, पोल र तारकोलागि बजेट छुट्टै राखेर अरु बजेट सबै टोलमा बाँडेका हुन्छौ । 

४- वडाको समग्र गतिविधिहरु सञ्चालन गर्दा जनताबाट निर्वाचित भएर आएका वडा सदस्यहरुलाई सहभागी गराइदैन भन्ने गुनासो सुनिन्छ । तपाईको वडामा त्यस्तो छ, कि छैन् ?

यो कुरा त मलाई सोध्नु भन्दा वडा सदस्यहरुलाई सोध्दा प्रष्ट हुने थियो । मैले त सबै वडासदस्यहरुलाई समेटेर लगेको छु भनौला, तर यो कुरा वडासदस्यहरुले भन्दा अझ राम्रो होला । हामी पाँचै जना जनप्रतिनिधिहरुमा कहिल्यै विमती भएको छैन् । हामी फरक राजनीतिक परिवेशबाट आएका छौं  । तर यो कुराको आभास मैले कहिले महसुस गरेको छैन् । र अन्य वडा सदस्यहरुलाई पनि यो आभास भएको छैन होला जस्तो लाग्छ । अहिलेसम्म हाम्रो वडामा वडाध्यक्ष र सदस्यहरुबीच तिक्तता भएको छैन् । हामी पाँचै जना जनप्रतिनिधि बसेर वडामा हुने हरेक काम मिलेर गर्दै आएको अवस्था छ । त्यस कारण यस्तो खालको गुनासो छैन जस्तो लाग्छ । 

५- वडाको समग्र समृद्धिका लागि तपाईका भावि योजनाहरु के छन् ?

हामीले हाम्रो वडालाई अन्य वडा भन्दा फरक, सफल, सक्षम र सम्बृद्ध बनाउनु पर्छ भनेर लागि रहेका छौं । तर वडालाई सबै कुरामा सम्बृद्ध बनाउनका भावी योजना त धेरै नै छन् । तर सबै कुरा राम्रो बनाउनकालागि बजेट नै चाहिन्छ । बजेट कम भएकै कारण हामीले वडामा योजना बनाएअनुसारको काम गर्न सकेका छैनौं । त्यसका बाबजुट पनि हामीहरु शिक्षा, स्वास्थ्य, बाटो लगायतको काम वडालाई हरेक कुरामा सम्बृद्ध बनाउनकालागि लागि रहेका छौं ।