श्रीराम दहित
जड-चेतनमय भगवानको रचना यो संसार
गुण-दोष मिश्रणको जीवन आउँदैन बारम्बार
अवगुण जति मोहमा परि अङ्गाली राख्यौं सधैं
दुध सम्झी अज्ञानवश पानीमै भुली रहेका छौँ कतै
पवित्र संस्कार विवाह आज दुई परिवारको मिलन खै
दाइजो रुपि धन देखाउने दाम्पत्य जीवनको प्रेमभाव खै
दाइजो रूपी दानव परम्परा झाँगिदै छ आज
कन्या भ्रुण हत्या अनि जिउँदै नारी जल्दै आज
ईच्छा शक्ति नहुँदा बहाना गर्दै महत्त्वपूर्ण समय खेर
शुभ मुहुर्तको जञ्जालमा परि कर्म गर्न नगरौं अबेर
ऋषि परम्परा अमृत वचन जन-जनमा पुर्याऔं
कुसंस्कार संग सधैं रहौं टाढा दुध-पानी छुट्याऔं
श्रद्धा का लागि मृतक भोज हो कि मनोरञ्जन गर्ने
आत्माको रोदन सन्तुलनमा ल्याउन किन पाप गर्ने
जो समृद्ध-सम्पन्न व्यक्ति छन् यहाँ अहंकार अब त्यागुन
सर्बसाधारण निमुखा व्यक्ति कुसंस्कारको नक्कल नगरुन
जहाँ दोष दुर्गुण व्याप्त देखिन्छ प्रतिरोध गरौं मिलि
मानवीय उच्च गुण देखाऔं सत्य कर्म गरौं नखिली
आचरण जन्य होस् वा भौतिक रूपी भ्रष्टाचार सधैं तिरस्कार
ज्यान जाओस् वचन न जाओस् दुध-पानी छुट्याउने संस्कार
