काठमाडौं २७ मंसिर । नेकपा (माओवादी केन्द्र)को स्थायी कमिटी बैठक बस्दैछ । बिहीबार दिउँसो ३ बजे पार्टी केन्द्रीय कार्यालय पेरिसडाँडामा बैठक बस्ने माओवादी केन्द्रका उपाध्यक्षसमेत रहेका प्रवक्ता अग्नि सापकोटाले जानकारी दिनुभयो ।
बैठकमा पुस २ देखि सुरू हुने केन्द्रीय कमिटी बैठकका एजेन्डाबारे छलफल हुनेछ । पार्टीनिकट विद्यार्थी संगठन अनेरास्ववियू (क्रान्तिकारी) को दुईपटक स्थगित भएको राष्ट्रिय सम्मेलनका विषयमा पनि छलफल हुने प्रवक्ता सापकोटाले जानकारी दिनुभयो ।
विद्यार्थीहरूबीच विवाद र कुर्ची हानाहान भएपछि स्थगित भएको सम्मेलन मंसिरको २३ र २४ गते गर्ने भनिएको थियो। तर तयारी नपुगेको र निर्वाचनको मोडालिटी पनि टुंगो लगाउन बाँकी रहेकाले फेरि स्थगित भएको थियो । बैठकमा पालिकाहरूमा गर्ने भनिएको खबरदारी सभा, पालिका सम्मेलन लगायतका विषयमा पनि छलफल हुनेछ ।
