सूर्य घर्तीमगर, मलेसिया, २३ पुस । एकजना रोल्पा घर भएका नेपाली श्रमिकले मलेसियामा ज्यान गुमाएका छन् । रोल्पा नगरपालिकाको धवाङ निवासी २६ वर्षीय अनिल रोकाले ज्यान गुमाएका हुन् ।
मृतक रोकाको शवलाई गएराति काठमाडौंमा उनका आफन्तहरुले बुझेका छन् । उनी ४ महिना पहिले मात्रै रोजगारीको सिलसिलामा मलेसिया पुगेका थिए ।
नेपालबाट चार महिना पहिले मलेसिया पुगेका रोकाले मलेसियामा TEY KEE FROZEN FOOD & TRADING SDN.BHD. कम्पनी जोहोरबारुमा काम गर्न थालेका थिए । अचानक गम्भीर बिरामी परेका रोकालाई प्राथमिक उपचारपछि HOSPITAL SULTANAH AMINAAH JOHOR BAHRU मा भर्ना गरिएको थियो । उपचारकै क्रममा उनको हस्पिटलमा दुःखद निधन भएको थियो ।
मृतक रोकाको शवलाई नेपाल पठाउनको लागि मलेसियास्थित नेपाली राजदूतावासले आवश्यक सबै कागजपत्रहरु तयार गरी सहयोगी भूमिका निर्वाह गरेको थियो । रोल्पाली सेवा समाज मलेसिया शाखाले कुटनीतिक नियोगसँग सरसल्लाह गरी पछिल्लो घटनाक्रमहरुमा मृतकको परिवार तथा आफन्तजनहरुसँग सञ्चार समन्वयको भूमिका निर्वाह गरेको थियो ।
मृतकको शव मलेसियाबाट ७ जनवरी २०२४ को बेलुकी ८ बजेको उडानबाट पठाइएको थियो । नेपाली समयअनुसार गएराति नेपालमा आफन्तले बुझेका छन् ।
