सूर्य घर्तीमगर
मलेसिया, २४ पुस । भवनको दुई तला माथिबाट खसेर गम्भीर अवस्थामा अस्पताल भर्ना भएका रोल्पाको रुण्टीगढी गाउँपालिका २ जौलीपोखरीका बिष्णुबहादुर बोहराको मलेसियामा मृत्यु भएको छ । करिव १५ महिना पहिले वैदेशिक रोजगारीको सिलसिलामा मलेसिया आएका बोहरा भवनको दुई तला माथिबाट खसेपछि उपचारार्थ अस्पताल भर्ना भएकोमा ८ जनवरीको बिहान २ बजेतिर मृत्यु भएको उनका बुवा होमबहादुर बोहराले जानकारी दिए ।
मृतक बोहरा मलेसियास्थित DBTS Industries Sdn.Bhd. नामक कम्पनीमा काम गर्न आएका थिए । काम गर्ने क्रममा बिल्डिङको दुई तला माथिबाट लडेर गम्भीर घाइते भएका थिए । बोहरालाई TUNKU AMPUAN RAHIMAH HOSPITAL KLANG MALAYSIA मा राखेर विगत २ महिनादेखि उपचार गरिएको थियो ।
मृतकका बुवा होमबहादुर बोहराका अनुसार विरामीको अवस्था निकै गम्भीर भएको हुँदा म्यानपावर एजेन्सी र रोजगारदाता कम्पनीको पहलमा बुवा होमबहादुर विरामी छोराको स्याहारसुसार गर्नको लागि नेपालदेखि मलेसिया आएका थिए । बोहरा दुर्घटनामा परी गम्भीर घाइते भएको खबर पाएलगत्तै रोल्पाली सेवा समाज मलेसियाले उक्त मुद्दामा नियमित फलोअप गरिरहेको थियो । रोल्पाली सेवा समाजका केन्द्रीय उपाध्यक्ष लालकुमारी रोका मगरले हस्पिटल पुगी विरामीको स्वास्थ्य अवस्थाको जानकारी लिनुको साथै चिकित्सकको टिमसँग पनि परामर्श गरेको जानकारी रोल्पाली सेवा समाजका अध्यक्ष तेजकुमार बुढाले दिए ।
पछिल्लो चरणमा बोहराको स्वास्थ्य अवस्था झनझन नाजुक हुँदै गएको थियो । अवस्था नाजुक हुँदै गएपछि आइसियु कक्षमा राखेर उपचार गर्दागर्दै उनको मृत्यु भएको थियो । मृतकका बुवा होमबहादुर बोहरा ८ जनवरी २०२४ को साँझ ६ बजेको उडानबाट नेपाल फर्किएका छन् । आवश्यक कागजपत्रहरु तयार भएपछि मृतकको शवलाई छिट्टै नेपाल पठाउने जानकारी रोजगारदाता कम्पनीले दिएको छ ।
