तेस्रो आँखा
काठमाडाैं,१३ वैशाख । वैशाख ३० मा हुने स्थानीय तह निर्वाचनमा ७५३ वटै पालिकामा १ लाख ३६ हजार २६९ उम्मेदवारले मनोनयन दर्ता गराएका छन् । निर्वाचन आयोगले मंगलबार बिहान सार्वजनिक गरेको विवरण अनुसार आइतबार र सोमबार गरी यो संख्यामा उम्मेदवारी दर्ता भएको हो ।
विभिन्न राजनीतिक दल र स्वतन्त्र उम्मेदवारको संख्या १ लाख ३६ हजार २६९ रहेको निर्वाचन आयोग नेपालले जनाएको छ । स्थानीय तहमा ३० वैशाखमा ३५ हजार २ सय २१ जनप्रतिनिधिका लागि चुनाव हुँदैछ । २०७४ को स्थानीय तहको चुनावमा १ लाख ५१ हजार १ सय ९० जनाले उम्मेदवारी दिएका थिए ।
कुन पदमा कति उम्मेदवार
मेयरः ३ हजार २६१
अध्यक्षः ३ हजार २५४
उपमेयरः २ हजार ३
उपाध्यक्षः २ हजार २९२
वडाध्यक्षः ३२ हजार ५९
महिला सदस्यः २३ हजार ३ सय ७५
दलित महिला सदस्यः २१ हजार ११५
सदस्यः ४८ हजार ९१०
आज उम्मेदवारको विरोधमा उजुरी दिन आयोगले भनेको छ । र, १४ र १५ वैशाखमा मनोनयनपत्र जाँच गर्ने तथा उजुरीउपर जाँचबुझ गरी निर्णय गरी उम्मेदवारको नामावली प्रकाशन गर्ने कार्यतालिका तय गरेको छ ।
१६ वैशाखमा उम्मेदवारले नाम फिर्ता लिने र उम्मेदवारको अन्तिम नामावली प्रकाशन गर्ने तथा १७ वैशाखमा उम्मेदवारलाई निर्वाचन चिह्न प्रदान गर्ने आयोगको कार्यतालिका छ ।
